PSHDK:Sulm i tmerrshëm barbar, i terroristëve kundër vlerave qytetëruese Evropiane

Partia Shqiptare Demokristiane e Kosovës shpreh dhembjen për viktimat e pafajshme, të cilat pësuan me rastin e aktit terrorist islamik, me ç’rast një person rrëmbeu kamionin dhe duke e ngarë me shpejtësi në drejtim të Sheshit në Nice të Francës, ku po mbahej ceremonia e përkujtimit të Bastiles, shtypi qindra qytetarë që kishin dalur për ta përcjellur ndezjen e fishekzjarreve në nderim të 14 korrikut, Ditës Kombëtare të Francës.

2016-07-15

Sipas informacioneve që kemi, deri në këto çaste, në këtë akt barbar terrorist gjeten vdekjen 84 qytetarë, kurse shumë të tjerë u plagosën rëndë e lehtë, në mesin e tyre pleq, gra e fëmijë.

PSHDK-ja , sikur edhe herave të tjera në raste të këtilla, solidarizohet me viktimat e pafajshme dhe shtetin e Francës, duke kërkuar me ngulm që të fuqizohet aleanca kundër terrorizmit islamik, në mënyrë që njëherë e përgjithmonë popujve të botës, pavarësisht gjuhës, kulturës, besimit, ngjyrës etj. t’u krijohen kushtet që të jetojnë në paqe e harmoni.

Të goditet sot qendra e kulturës botërore dhe një nga bastionet e artit, letërsisë e kulturës evropiane, dhe jo vetëm e këtij kontinenti, është veprim i paramenduar mirë, për të ndryshuar drejtimin e rrjedhave të qytetërimit evroperëndimor, duke e zëvendësuar me një civilizim tjetër sa të prapambetur, aq edhe antihuman.

Franca është një shtet, e cila në vazhdimësi ka qenë e hapur për emigrantët hallexhinj, të cilët për shkaqe ekonomike dhe të tjera kanë braktisur vendet e tyre dhe kanë gjetur strehim e përkujdesje në këtë vend evropian me traditë dhe kulturë shumë të lashtë, në zemër të këtij kontinenti.

Franca si vend i mundësive të mëdha, jo rrallë ka qenë edhe shënjestër e sulmeve, pikërisht të atyre që kanë gjetur shpëtimin për vete dhe familjet e tyre, duke e keqpërdorur kështu në mënyrën më të egër nikoqirllëkun e saj.

Mirëpo, sot jo vetëm Franca, por i gjithë kontinenti u është ekspozuar sulmeve të këtilla terroriste për të mbjellur frikë e panik, të shkaktohen sa më shumë rrënime, vrasje e gjakderdhje me qëllim të pengimit të demokratizimit edhe të atyre shoqërive si qëllim final, që sot vuajnë nën thundrën e regjimeve diktatoriale , autokratike dhe despotike .

PSHDK-ja edhe njëherë rithekson se mbështet dhe qëndron pranë atyre shteteve, të cilat janë për ashpërsimin e luftës kundër terrorizmit, veçmas atij islamik, si kërcënim global.

Zyra për Informim e PShDK-së 14.07.2016